Dhammapadapāḷi · Suttapiṭaka · Tripitaka

Yamakavaggo

||Namo tassa bhagavato arahato sammāsambuddhassa||

Khuddakanikāye

Dhammapadapāḷi

1. Yamakavaggo

1. Cakkhupalatthera Vatthu

Manopubbaṅgamā dhammā, manoseṭṭhā manomayā;
Manasā ce paduṭṭhena, bhāsati vā karoti vā;
Tato naṃ dukkhamanveti, cakkaṃva vahato padaṃ.

2. Matthakundali Vatthu

Manopubbaṅgamā dhammā, manoseṭṭhā manomayā;
Manasā ce pasannena, bhāsati vā karoti vā;
Tato naṃ sukhamanveti, chāyāva anapāyinī [anupāyinī (ka.)].

3. Tissatthera Vatthu

Akkocchi maṃ avadhi maṃ, ajini [ajinī (?)] maṃ ahāsi me;
Ye ca taṃ upanayhanti, veraṃ tesaṃ na sammati.

4. Tissatthera Vatthu

Akkocchi maṃ avadhi maṃ, ajini maṃ ahāsi me;
Ye ca taṃ nupanayhanti, veraṃ tesūpasammati.

5. Kalayakkhini Vatthu

Na hi verena verāni, sammantīdha kudācanaṃ;
Averena ca sammanti, esa dhammo sanantano.

6. Kosambaka Vatthu

Pare ca na vijānanti, mayamettha yamāmase;
Ye ca tattha vijānanti, tato sammanti medhagā.

7. Mahakalatthera Vatthu

Subhānupassiṃ viharantaṃ, indriyesu asaṃvutaṃ;
Bhojanamhi cāmattaññuṃ, kusītaṃ hīnavīriyaṃ;
Taṃ ve pasahati māro, vāto rukkhaṃva dubbalaṃ.

8. Mahakalatthera Vatthu

Asubhānupassiṃ viharantaṃ, indriyesu susaṃvutaṃ;
Bhojanamhi ca mattaññuṃ, saddhaṃ āraddhavīriyaṃ;
Taṃ ve nappasahati māro, vāto selaṃva pabbataṃ.

9. Devadatta Vatthu

Anikkasāvo kāsāvaṃ, yo vatthaṃ paridahissati;
Apeto damasaccena, na so kāsāvamarahati.

10. Devadatta Vatthu

Yo ca vantakasāvassa, sīlesu susamāhito;
Upeto damasaccena, sa ve kāsāvamarahati.

11. Sariputtatthera Vatthu

Asāre sāramatino, sāre cāsāradassino;
Te sāraṃ nādhigacchanti, micchāsaṅkappagocarā.

12. Sariputtatthera Vatthu

Sārañca sārato ñatvā, asārañca asārato;
Te sāraṃ adhigacchanti, sammāsaṅkappagocarā.

13. Nandatthera Vatthu

Yathā agāraṃ ducchannaṃ, vuṭṭhī samativijjhati;
Evaṃ abhāvitaṃ cittaṃ, rāgo samativijjhati.

14. Nandatthera Vatthu

Yathā agāraṃ suchannaṃ, vuṭṭhī na samativijjhati;
Evaṃ subhāvitaṃ cittaṃ, rāgo na samativijjhati.

15. Cundasukarika Vatthu

Idha socati pecca socati, pāpakārī ubhayattha socati;
So socati so vihaññati, disvā kammakiliṭṭhamattano.

16. Dhammika-upasaka Vatthu

Idha modati pecca modati, katapuñño ubhayattha modati;
So modati so pamodati, disvā kammavisuddhimattano.

17. Devadatta Vatthu

Idha tappati pecca tappati, pāpakārī [pāpakāri (?)] ubhayattha tappati;
“Pāpaṃ me kata”nti tappati, bhiyyo [bhīyo (sī.)] tappati duggatiṃ gato.

18. Sumanadevi Vatthu

Idha nandati pecca nandati, katapuñño ubhayattha nandati;
“Puññaṃ me kata”nti nandati, bhiyyo nandati suggatiṃ gato.

19. Dvesahayakabhikkhu Vatthu

Bahumpi ce saṃhita [sahitaṃ (sī. syā. kaṃ. pī.)] bhāsamāno, na takkaro hoti naro pamatto;
Gopova gāvo gaṇayaṃ paresaṃ, na bhāgavā sāmaññassa hoti.

20. Dvesahayakabhikkhu Vatthu

Appampi ce saṃhita bhāsamāno, dhammassa hoti [hotī (sī. pī.)] anudhammacārī;
Rāgañca dosañca pahāya mohaṃ, sammappajāno suvimuttacitto;
Anupādiyāno idha vā huraṃ vā, sa bhāgavā sāmaññassa hoti.

source: http://www.tipitaka.org/romn/

Advertisements